الأربعاء، 20 مارس، 2013

طريقه ملء مل الفالتحاق بالكليه الحربيه والكليات والمعاهد العسكريه,فيديو,الأوراق المطلوبه فى الملف, القيد العائلى
بسم الله الرحمن الرحيم


بُص ياسيدى بعد ماخلاص رحت الكليه الحربيه وسحبت ملف التقديم زى ماتكلمنا , دلوقت بقى عليك انك تملأ الملف دا علشان تروح الكليه وتسلمه


ملف التقديم دا عباره عن إييه ؟
دا الملف الى أخدته ورحت اشتريته من الكليه زى ماقلنا , هوا عادى عامل زى كتاب كدا فيه صفحات , - نسيت أصوره ليك - بس أعتقد انه عادى ماتفكرش كتير يعنى هوا ملف وخلاص ... المُهم ان الملف دا مطلوب انك تملاه وتخلصه وتروح تسلمه للكليه الحربيه , علشان بقى تبتدى اختباراتك
فهتكتب فيه حاجات زى معلومات عنك وعن قرايبك وهاتكتب فيه درجاتك ومؤهلك وهاتحط فيه أوراق وحاجات عنك وعن والديك وبعض قرايبك 
وهيبقى الملف دا هوا الى بيمثلك داخل الكليه الحربيه وهايشوفه ممتحنيك .

ايه بقى الى المفروض أعمله فى الملف دا وأملاااه إزااى ؟
بص ياسيدى , وصل ع النبى فى الأول كدا .... هاتملى الملف إزاى والملف دا عاوزك تعمل اييه ؟ .. الملف دا فيه حاجات هاتكتبها بالقلم وفيه أوراق هاتحطها فيه , والورق الى بتحطه تدبسه مش تلزقه ..






  • الحاجات الى المفروض تكتبها فى ملف التقديم 

     بخصوص الحاجات الى المفروض انك تكتبها فى ملف التقديم فهى عاادى خالص بعض الحاجات والمعلومات الى مطلوبه منك انك تكتبها فى الملف
    زى طبعاً اسمك , نسبتك فى الثانويه العامه , شعبتك , موعد ميلادك , معلومات عنك , وأسماء أخوانك وأخواتك وأعمارهم ومؤهلاتهم , ومعلومات عن والديك وأجدادك , واسماء أعمامك ووزوجاتهم , وعماتك أزواجهم , وخيلانك وزوجاتهم , وخالاتك وأزواجهم , ومعلومات عن كل دول , زى العمر والمؤهل ومحل الميلاد والوظيفه , ويستثنى الى مش موجود أصلاً , وغيرها بعض الحاجات زى رقم تليفونك ورقم تيلفون البيت ورقم حد تانى
    وبعض الحاجات الى هايطلبوها منك زى توقيع و "" 
    ختم النسر "" الى زهقونا منه , ويتمضى من الوحده المحليه الى عندكوا ومن اربع موظفين
    وحاجات كدا هانبقى ان شاء الله مع بعض واحده واحده فيها والى هاتقف عليه حاجه ان شاء الله هانقلها لبعض , وان شاء الله هى بسيطه .
    وان شاء الله كل الحاجات الى المفروض انك تكتبها مش هاتاخد وقت فى كتابتها ,, حتى لو قلنا يومين تلاته , بس تسأل عنها قرايبك وأهلك , ويقولوك عنها وتكتبها والحاجات الى تخصك وتخص والديك تكتبها وهكذا ...
    انما الى بياخد وقت فى الملف دا هى ( الأوراااق ) الأوراق المطلوبه فيه .
    بس المهم انك ماتكتبش حاجه كدا ع طول من غير متتأكد منها علشان ماترجعش تشطب ولا تحط مزيل ولا تبوظ فى الملف دا , فمش عاوزك تشطب فى الملف دا ولا تعمل فيه حاجات من دى .

    وهما فى الكليه زى ماقلتلك هايسلموك مع الملف ( اسطوانه ) .. الاسطوانه دى هايكون فيها فيديو بيشرح طريقه ملء ملف التقديم دا والأوراق المطلوبه فيه صفحه صفحه وبالصوت , وفيها تعليمات عن ملء الملف بالتفصيل وكدا ,, وايه المفروض تكتبه فى الملف وفين .
    وعموماً هوا دا الفيديو الى كان فى الاسطوانه والى فيه شرح طريقه ملء ملف التقديم للكليات والمعاهد العسكريه بالصوت والصوره وبالتفصيل .

     فيديو يوضح طريقه ملء ملف التقديم للكليات والمعاهد العسكريه 



    الأوراق المطلوبه فى ملف التقديم 
     وزى ماقلتلك بخصوص الحاجات الى تتكتب قى ملف التقديم , فدى معلومات وحاجات ممكن انت تنجز فيها فى يومين أو حتى يوم وتكون مخلصها , لكن الأوراق بقى الى مطلوبه فى الملف بتاخد وقت , لأن فيه أوراق بتحتاج تطلعها من أماكن زى السجل المدنى مثلاً , وبتاخد وقت عندهم ع مايطلعوها لك . 

    ايه هى بقى الأوراق الى هاتحتاجها فى الملف ؟
    زى ماقلنا انه فيه أوراق هاتحطها فى الملف دا , ولكل ورقه ليها صفحه مكانها الخاص فى الملف تحطها فى مكانها والأوراق الى بتحطها تدبسها مش تلزقها , حتى علشان لوحبيت تغيرها ولا حاجه , ولو مش موجوده , تكتب فى وسط الصفحه " لن يكن " .
    الأوراق دى فيها الى بيطلع ع طول والى معاك , وفيها الى بياخد وقت ع مايطلع من الجهه الى انت بتطلعها منها
    فعلشان كدا بقى عاوز أقولك ع الورق دا وتطلعه ازاى وايه الى بياخد وقت علشان تحاول تعمله الأول وتسثمر وقتك
    وملحوظه بقى ,, فى الأول وانت بتستلم الملف وزى ماقلتلك بردو , هتاخد ملفين واحد أزرق والتانى أبيض , والأزرق دا الى احنا عمالين نتكلم عليه ودا الى بيتسلم فى الأول ( فى المرحله الأولى ) أما الأبيض دا فمش هاتسلمه إلا بعد ماتعدى إن شاء الله الإختبار الطبى أو الرياضى زى ماهيطلبوه منك , وساعتها هتحتاج تملاه هوا كمان وهيكون الورق الى مطلوب فيه من الورق الى حطيته فى الملف الأول ,
    علشان كدا بقى , أى ورقه هاتطلعها وتحطها فى الملف الأول دا ( الملف الأزرق ) صورها واحتفظ بنسخه منها معاك , علشان ممكن تحتاجها فى الملف التانى , بعد ماتعدى الاختبارات ان شاء الله ,, وندخل بقى ع الورق الى هاتحتاجه فى الملف .


    •  ورقه القيد العائلى للوالدين والجدين 
    الورقه دى بقى ياسيدى تقريباً أهم ورقه مطلوبه منك فى الملف دا , وأكتر ورقه بتاخد وقت علشان تطلع , فممكن تاخد أسبوع تقريباً على ماتطلعها
    وعلشان كدا بقى انت اعمل حسابك انها أول حاجه هاتعملها بعد ماتاخد ملفك وهى أول ورقه تروح تعملها وتسيبها على ماتطلع , وتشتغل بقى فى الفتره دى ع ملفك والحاجات التانيه الى فيه , بحيث ان طول الفتره الى هاتطلع فيها الورقه دى يبقى انت بتعمل الحاجات التانيه المطلوبه منك فى الملف , وتكون آخر حاجه هى الورقه دى أول متطلع تحطها فى مكانها فى الملف وبس ,  .
    والورقه دى عامله زى شهادت االميلاد كدا , بيكون الهدف انها قيد , زى اثبات كدا لعيلتك أبويك وجديك , ع انهم مصريين .

    طيب ورقه القيد العائلى دى بتطلع منيين وإزااى ؟
    الورقه دى بتطلع من السجل المدنى التابع لك ,, سواء بقى الى فى مركزك أو فى مدينتك فتروح للسجل المدنى الى عندكوا وتطلعها منه
    وبردو ع فكره بيكون معروف ان دا وقت الطلاب بيروحوا السجل المدنى علشان يطلعوا القيد العائلى .

    هاتطلعها ازاى وتاخد ايه معاك وانت بتطلعها ؟
     ياسيدى , انت هاتاخد معاك
    شهادات ميلاد كل أخواتك , وشهادات ميلاد والدك ووالدتك , وبطاقه والدك وبطاقه والدتك , وبطاقتك فى جيبك
    وروح بقى السجل قله عاوز أطلع قيد عائلى , هايقولك صور حاجات تصورها وتديله الورق دا
    وبعدين هايقولك تمام تعالا خدها بعد كذا يوم . , ولما تروح تاخدها اعمل حسابك ع 15 جنيه تقريباً . 

    •  صوره طبق الأصل من مؤهل الثانويه العامه 
     . الى هى شهاده الثانويه العامه الى فيها درجاتك وصورتك دى , والى بتروح تاخدها من مدرستك كدا كدا بعد ماالنتيجه بتطلع , علشان بيها بتقدم لكليتك أياً كانت بقى حربيه أو غيرها .
    طب يعنى ايه طبق الأصل ؟
    يعنى هاتصورها عادى , بعدين ترجع مدرستك تديها للأخصائى أو المدير بتاعك يمضى عليها , وبعدين يختمولك بردو "" ختم النسر "" 
    -- وربنا أنا حاسس ان النسر زهق أكتر منا -- 
    المهم يعنى , هى دى ياسيدى الى طبق الأصل , ودى تحطها بردو فى مكانها فى الملف , زى كل الورق والى ليه مكانه وصفحه خاصه بيه فى الملف 


    •  صور مؤهلات الوالدين الدراسيه , وشهاده لإثبات الوظيفه 
      . تطلب بقى من والديك يجيبوا لك صور من مؤهلاتهم الدراسيه ( ابتدائيه - إعداديه - دبلوم - ثانويه - بكالوريوس ) كدا يعنى , وتحطها مكانها .مؤهل الوالدين " هتلاحظ انه بيتطلب كتير منك فى الملف , سواء كتابى أو بالشهادات .
    طب لو مافيش مؤهل سواء للوالد أو الوالده ؟؟

    فللأسف النقطه دى مش هاكذب عليك وأقولك مابتأثرش , لأنها أثرت عليا أنا شخصياً لما قدمت لأن " أبوك مامعهوش مؤهل "
    وللأسف الكذب مابينتهيش سواء بالنفى عن حاجات زى دى أو غيرها , أو حتى لو بعض المسؤلين داخل الحربيه بينفى بصدق , ففيه البعض داخل الكليه عاوز ( إزاااله ) علشان دماغه فيها ( فاااش ) , ولا أخجل أقول كدا وأكتر من كدا ع نااس حتى فى مؤسسه عريقه زى دى .
    وعلشان كدا , أقسملك بالله ( وبعيد عن أى حاجه ) المؤسسه دى احنا كشعب مصرى حتى لو كنا تحت اسم يدوبك ( طُلاب ) أو راغبى التقديم
    لو لقينا ظلم ع أى ناحيه فى الكليه دى فى أى حاجه وضد أى حد بس يكون ثابت كلامه بالأدله ,, أنا شخصياً موافق أروح معاه واتكلم بالسانه لتنظيف العقول الى زى دى والى بيحرموا ناس ليهم الأحقيه فى دخول مؤسسه زى دى .

    فمش زنب أبويا انه ماتعملش علشان وقته كان أهله أهملوا فى حقه وماعملهوش ,, وبالطبع مش زنبى ان أبويا أو أمى مامعهاش مؤهل علشان ماتعلمتش بالقدر الكافى , لكن يكفى نفسى ويكفى انى متأكد انهم أشرف وأنظف وأحسن مليون مره من ناس تانين بيتقال عنهم : الدكتور الفلانى أ, الأستاذ العلانى أ, المهندس البتاع أو أى بتاع من دوول . 
     ومش زنبى انى جيتلك الكليه أقدم وأنا ماعيييش خالى لواء صاحبك فى الجيش , ولا أبويا يعرف واحد معرفه لواء ومستنى يخدمه أى خدمه  ولا زنبى انى مامعيش 40,000 جنيه علشان أدفعهم لسعادتك علشان تدخلنى الكليه .
     . وبردو بقول عارف ان مش الكل كدا وان كتير منهم بيرفض دا , بس فيه حاجات من تحت لتحت بتحصل , وطالما العقول أصلاً متربيه ع كدا , وأصلاً اللوا دا أو أياً كانت رتبته داخل بنظام الوسايط والمحسوبات , ازاى عاوز تقنعنى انه مش هايطبقه على غيره .

    بس بردو أرجع وأقولك وزى ماقلتلك فى الأول هى نصييب وتوفيق من ربنا عز وجل , وطالما هاتعمل الى عليك ان شاء الله الأصلح هوا الى هيكون لك ,, بس كنت بقول النقتين دول ورا بعض علشان أقولك اننا عاوزين فعلاً نكون مع بعض ضد ظلم أو فساد حتى لو ف الكليه الحربيه , وحتى لو مش تجاهى , فطالما معاك اثبات ودليل يأكد الفساد انا عن نفسى هاكون معاك ان شاء الله و وان شاء الله كل الطلاب هيشاركوا فى دا .

     طيب وشهادت إثبات الوظيفه ؟
     دى لو والدك موظف , من مكان توظيفه هايطلعها ع طول بردو "" بختم النسر "" أو محل عمل والدك أياً كان أو السجل التجارى أو البطاقه الضريبه لو والدك بيشتغل فى العمل الحر أو ع المعاش أو متقاعد من العمل 


    •   شهادت حسن سير وسلوك 
    دى بتطلع من مدرستك والى بيسموها صحيفه الحاله الجنائيه ( الفيش والتشبيه ) , ودى تروح لمدير مدرستك وهاتطلعها من هناك عادى 

    • كارت طولى للوالدين معاً ع خلفيه بيضاء 
    . يعنى صوره طوليه لوالدتك ووالدتك جنب بعض فى صوره واحده , وخلفيه الصوره تكون بيضاء
    و الصوره تكون جايبه الجسم كله " من الرجل للرأس " .
     

    طيب لو منفصلين أو أحدهما مسافر ؟

     . عادى تجيب صوره لكل منهم , بردو كارت طولى لكل واحد وخلفيه بيضاء , - بس حاول تكون زى ماهى مطلوبه -

    •  أى أوراق ملكيه سواء ليك أو للوالدين 
     يعنى لو قطعه أرض , أو عندكوا بيت تانى , أو أى  عقار أو نشاط تجارى , تجيب صوره ليه (( مش صوره للأرض ) صوره لللعقد ( عقد التمليك ) 
    •  وطبعاً صور للبطايق بتاعتك وبتاعت والديك
     صور وش وظهر لبطاقتك ولبطاقه والدك ووالدتك , وتكون البطايق غير منتهيه , وتكون رقميه . فى حاله أحدهما متوفى , يبقى ترفق شهادت الوفاه وتذكر بيانات المتوفى .


    طيب المفروض أخلص ملء الملف دا وأسلمه ع امتى كدا ؟
     بيكون مكتوب فى الملف من برا ميعاد كاد , الميعاد دا الى المفروض انك تقدم فيه ملفك للكليه الحربيه .
    طيب وإن مالحقتش أخلص الملف قبل الميعاد دا ؟
    ولا أى حاجه عاادى خالص , هوا أه الميعاد دا مكتوب لكن انت مش مقيد بيه , هوا بس الغرض من انهم كاتبين الميعاد دا ع ظهر الملف وبيقولولك عليه , هوا انهم مش عاوزين تكدس كبير فى بعض الأياام الى بيكون الطلاب بيقدموا فيها ملفاتهم , فعاوزين الطلاب يتوزعوا فى تقديم الملفات ومايجوش كلهم فى أيام قليله, لو اتأخرت عن الميعاد دا فى تقديمك للملف مش مشكله , بس المهم انك تقدمه قبل قفل باب تقديم الملفات ودا الى بيكون فى الآخر خالص .. بس وليه يعنى انت اعمل الى عليك بدرى بدرى , وخلص ملفك وبعدين روح قدمه مش مهم فى نفس الميعاد الى مكتوب عندك , بس حاول تقدمه بدرى مش متأخر طالما خلصته علشان تدخل اختباراتك بدرى وان شاء الله تخلصها كلها وتبقى فيها تمام .




    ـــــــــــــــــــــــــــــــــــــــــــــــــــــــــــــــــــــــــــــــــــــــــــــ



    تابع كل جديد معنا ع صفحه الفيس بوك إضغط على زر أعجبنى , ثم تأكيد .
    شارك هذه الصفحه ع الفيس بوك
    | | | | | |
    ابعت هذه الصفحه لصديق لك أو لجروب على الفيس بوك
    الصفحه الرئيسيه من التقديم
    معلومات عامه عن الكليات والمعاهد العسكريه , والشروط العامه للتقديم والإلتحاق بالكليه الحربيه
    سحب ملف التقديم والإلتحاق بالكليه الحربيه- وأول يوم لك فى الكليه
    ملء ملف الالتحاق بالكليات والمعاهد العسكريه - والأوراق المطلوبه فيه
    تسليم ملف التقديم للكليه الحربيه - وأول اختبار لك فى الكليه ( اختبار السمات الشخصيه
    صفحتنا ع الفيس بوك
    احمد محمد العوضى